Mat 28 | BEF | STEP | To etehi go'i noligo Yuta bona'magi fuli yupaha'ani salelegu su halube'mu nohigo loe a'i Malia Magatala to ya'ma fato Malia hiti muli'mogu bi'aha'ina.

Matthew 28

Yesu mulimoguti ho ti'ehina

Mk 16:1-10; Lk 24:1-12; Yn 20:1-10

1 To etehi go'i noligo Yuta bona'magi fuli yupaha'ani salelegu su halube'mu nohigo loe a'i Malia Magatala to ya'ma fato Malia hiti muli'mogu bi'aha'ina. 2 To mele'isi mone imima'i sipinamo li'ehina. Hu'mau mone agelo ho lifigo limi'ehina bouba ya'ma mulimofihi efapo hekini lose'na li koli he'mito ana efapolo mino'ehina. 3 Ya'ma agelo okaba'alo kopisi'na suhi huto besa besa lo'ehigo to gukete ana huto koholina sipi'amo huto hu'ehina. 4 To gimi bomagi ai'i be gelete sipi koli hite afoya foya ilete enubu neta neta bite melugu ke'ahana.

5 To agelouba a'male'i lu etimi'ehina: Letali koli mehiliyo. Yesu malipu yafalo ho fili'ahana bo kumu sa sa neha'inamo'mu akeheli'ohube. 6 Ai malo'i menohinagihe. Ai fili'ehinagati aku ho tilube luto lu'ehina'a ya huto ho ti'ehibe. Ete manugu tilete koyapa'i gufa'a ko'ehinalo be galiyo. 7 To letali yatai koko pana'a nehanalo me'me hite bite fili'ehinagati ho ti'ehibe lite lu epiliyo. Ai Galili kapogu tubuto enali hiti analo fo tumala hilune luto lu'ehinagihe lite lu epiliyo. To nani alu noletumube agelouba ya luto lu'ehina kaga. 8 Ya noligo ana a'male'i sipi koli hite aku etegepohi nelite muli'moguti he'mite hololu lite bite koko pana'aloga agelomofihi nona'a lu epilube'mu bi'aha'ibe.

9 To etali hololu lite neba'igo ana'asi enubulo Yesu kapogu huto hu'ehibe. Neha'ifiye? luto lu etimi'ehina. Ya ligo etali ete gigusa'alo nu kilete meto kelete aitoga agoya hu emite mine'aha'ibe. 10 To Yesu lu etimi'ehina: Koli mehiliyo. Nogonamu tamu'ni nehanaga bite Galili kapogu nanitoga enogo fo tumala hilune, luto lu epiliyo, Yesu ya luto lu'ehina.

Gimi bomagihi suguna ka'ani

11 To a'male'i kapo melete tauniga neba'igo gimi bona'i mulimogu kaba hi'ahanamagi sipi mono bomagitoga bilete asaga'i be ge'ahananamo lu yege he'ahabe. 12 To sipi mono bomagi ana kaga kehelilete mono kanisole bona'magitoga bite li gehesa hi'ahana. To ya'ma mono bomagi gimi bona'i efahi epilune'mu nehabe. 13 Hena'mugope? Enali lu epi'ahana: Yesuhi koko pana'amagi folugu'i ete gufa'a lenali lenubu'i kelete nehago gumina lite fenene hi'ahabe. Ya kaga lu epilo, lite lu epi'ahana. 14 To ana kanisole bomagi kaga mone hiti lu epi'ahana: To, Lomu kaba bouba ya'ma lenali lenubu'i ke'ahana kagamofihi kehelilenogo lali ya'mana aitoga bati hu lepalalune, lite li'ahana. 15 Ya lu epi'ahago gimi bomagi o'yo lite efaha'ani nona'a lilete to mono kanisole bona'i kaga'ani boana'magihi ya'ma lu epi'ahabe. Ya'ma faga luse'na'ani minoba minoba huto bilina'mu yabe. Yatai Yuta bona'i anana keheli amuya mele'ahana.

Yesu koko pana'amagihi enubulo huto hu'ehina

Mk 16:14-18; Lk 24:36-49; Yn 20:19-23; Apo 1:6-8

16 To Yesuhi koko pana'a nayahi luga luga su hago nigigusagati mone heleko malago Galili kapologa bilete koyapa'i Yesu mone kosagu enelepi'ehinaga fo tumala hilune lutomo ti'ahana. 17 To nehetite Yesuhi be gelete aitoga agoya hu emi'ahana. Enali mone luga'amagi yigise loe lae hilete Yesu nohifi fato bo nohifi lite keheli'ahana. 18 Yesu koko pana'amagihi ma luto lu epi'ehina: Kokulumalugu hiti melugu hiti asaga'na kaba hilane lutomo Afo'nifu ya'ma nimi'ehina. 19 Yamu'i lenali asaga melugu bonatoga bite nani naga'ni enele'mo lolo hilo. To ana bona'magihi afo'nifihi gi'alo hiti pana'amofihi gi'alo hiti to Sikalafu'mofihi enigilo li melete nagami'i folo epalalo. 20 To asaga nani lu lepi'ohuna ka lenali bite lu enelepinogo kehelite liyafa hite mege'i malalabe. To lenali kehelilo. Nani lenali hiti asaga yupahi moneka nohinogoti ma me'i su halina kanagu hiti lenali aku'i minaluta'mu yabe.